Milli Aviasiya Akademiyasının kitabxanası cari ilin 11-15 noyabr tarixlərində Azərbaycan Respublikası Mədəniyyət Nazirliyinin təşkilatçılığı ilə ümummilli lider Heydər Əliyevin 100 illik yubileyinə həsr olunmuş 9-cu Bakı Beynəlxalq Kitab Sərgisində (“Baku International Book Fair 2023”) iştirak etmişdir.
Bakı Ekspo Mərkəzində keçirilmiş sərgidə 11 ölkədən olan 30-dan çox xarici təşkilat, 109 yerli nəşriyyat-poliqrafiya müəssisəsi və universitet kitabxanaları, kitab evləri iştirak etmişdir. Sərgi çərçivəsində tanınmış şair və yazıçıların, elm adamlarının iştirakı ilə çoxsaylı kitab təqdimatları, imza günləri, seminarlar, həmçinin poeziya saatları keçirilmişdir.
Milli Aviasiya Akademiyasının kitabxanası sərgidə uğurla iştirak etmiş, akademiyamızın stendi geniş ictimai kütlənin diqqətini cəlb etmişdir. MAA-nın kitabxanası üçün ayrılan guşədə fondun siyahısına daxil olan yeni kitablar, dövri nəşrlərimiz və akademiyamız haqqında hazırlanmış videoçarx nümayiş etdirilmişdir. Sərgi ziyarətçilərinə MAA-nın stendindəki nəşrlərlə yanaşı, kitabxananın təqdim etdiyi elektron xidmətlər, beynəlxalq data bazaları haqqında geniş məlumat verilmişdir. Azərbaycan xalqının ümummilli lideri Heydər Əliyevin həyat və fəaliyyətindən bəhs edən kitablar böyük marağa səbəb olmuşdur.
13 noyabr tarixində akademiyanın nəzdində fəaliyyət göstərən Azərbaycan Mülki Aviasiya Muzeyinin təşkilatçılığı ilə hazırlanan “Heydər Əliyev və Azərbaycan Mülki Aviasiyası-100” kitabının təqdimat mərasimi keçirilmişdir. Geniş auditoriyanın marağına səbəb olmuş həmin təqdimatda bir sıra natiqlər çıxış etmişdir. Təqdimatın sonunda iştirakçılara “Heydər Əliyev və Azərbaycan Mülki Aviasiyası-100” kitabı hədiyyə edilmişdir.
MAA-nın tələbələrinin sərgidə iştirakı diqqətdən yayınmamışdır. Həmçinin stendimiz ilə yaxından tanış olan sərgi iştirakçılarına akademiya tərəfindən hədiyyələr təqdim edilmişdir.
Sərgi zamanı müxtəlif mətbuat nümayəndələri stendimiz ilə yaxından tanış olmuş, foto və video görüntülər qeydə almışlar.
Sərgidə uğurlu iştirakına görə Milli Aviasiya Akademiyası diplomla mükafatlandırılmışdır.
Foto Qalereya
