Milli Aviasiya Akademiyasının (MAA) Tələbə Yaradıcılıq Evi gənclərdə yaradıcı potensialın aşkarlanması və inkişaf etdirilməsi, mühəndis hazırlığında layihələndirmə, istehsal, sınaq və istismar texnologiyalarının tətbiqi, praktik işləmək bacarıqlarının əldə edilməsi, nəzəri biliklərin təcrübədə möhkəmlənməsi, yoxlanılması və təsdiqlənməsi məqsədilə yaradılmışdır.

Tələbə Yaradıcılıq Evi 2018/2019-cu tədris ilində layihələndirilmiş və inşa edilmiş, 2020-ci ildə istifadəyə verilmişdir. Burada tələbələrin praktik çalışması üçün müasir avadanlıq, dəzgah, cihaz və alətlər, müxtəlif təyinatlı element bazası ilə təchiz olunmuş mexanika, avionika, elektrik və elektronika tədris emalatxanaları, anqar, layihələr üzərində işləmək üçün zəruri şərait, təcrübi istehsalat sahəsi yaradılmışdır. 2020-ci ildən başlayaraq MAA-nın Tələbə Yaradıcılıq Evində «Azərkosmos» ASC, «SilkWay Holding», «Sinam» və «İntelPro» şirkətləri ilə birlikdə aerokosmik sahəyə aid olan layihələr, o cümlədən tələbələrin və gənc tədqiqatçıların Startap layihələri üzərində işlər yerinə yetirilir.

Bu işlər əsasən təyyarə, kopter və peyk tipli müxtəlif təyinatlı pilotsuz uçuş aparatlarının (PUA), reaktiv mühərriklərin, enerji qurğularının, məsafədən idarəetmə, avtopilot, stabilləşdirmə, naviqasiya, lokasiya, radioəks-təsir, həmçinin obyektin tanınması, video monitorinq və digər sistemlərin layihələndirilməsi, istehsal və sınaq texnologiyalarının işlənməsi istiqamətində aparılır. Eyni zamanda burada tələbələr, təklif etdikləri yeni layihələr üzərində işləmək imkanlarına malikdirlər.

Layihələr ən müasir texnoloji yanaşma ilə yerinə yetirilir, tələbələr qabaqcıl metodlar, materiallar və layihələndirmə üsulları, xüsusi proqram paketləri, 3D, CAD/CAE/CAM və bir sıra digər müasir texnologiyalardan istifadə imkanlarına malik olurlar. Tələbə Yaradıcılıq Evi MAA-nın Aviamodelçilik laboratoriyası, Elmi Tədqiqat Nəqliyyat və Aviakosmik Problemləri İnstitutu, istehsalat sahəsi, ixtisas kafedraları ilə birgə fəaliyyət göstərir.

Tələbə Yaradıcılıq Evi həm tələbələr, həm də MAA-nın AAQ 147/66 tələbləri əsasında fəaliyyət göstərən Texniki Xidmət Məktəbinin B1 (texnik-mexanik) və B2 (texnik-avionik) kurslarının dinləyiciləri üçün ilkin praktik məşğələ bazasıdır. MAA-nın Tələbə Yaradıcılıq Evinin genişləndirilməsi, yeni və perspektiv layihələrdə daha çox tələbələrin iştirakının təmin edilməsi istiqamətində işlər prioritet təşkil edir və mütəmadi olaraq davam etdirilir.